Перши гуманитарни базар будзе у Керестуре

автор А. Медєши
832 Опатрене

РУСКИ КЕРЕСТУР – Перши гуманитарни базар за зберанє пенєжу за лїченє двоїх дзецох зоз кулскей општини, Уну Вуканац зоз Червинки и Машу Плесконїч зоз Сивцу, будзе отримани на нєдзелю, 11. юния у центру Руского Керестура.

Базар орґанизую шейсц дзивчата з валалу – Николина Зорич, Настася Надь, Ваня Петкович, Андрея Югик, Мария Малацко и Сабина Планчак, а на идею Зоричовей, хтора до нєдавна була членїца гуманитарного здруженя 1000 за 1000, чия робота була унапрямена на зберанє пенєжу за лїченє хорих дзецох у кулскей општини.

Як за Рутенпрес потолковала Николина, за базар людзе можу донирац рижни свойо продукти, а звичайно преходза колачи, слани печива, овоц, желєнява, домашнї соки, маджуни, мед, квеце, рижни ручни роботи и подобне, а тиж и услуги як цо штриганє, фениранє, кладзенє нохцох, кошенє трави и подобне. Буду потребни и аниматоре, особи хтори рисую дзецом по твари, аниматоре за варґочики, як и помоц коло орґанизациї, кед ше вельо людзе явя зоз донациями.

Зоричова наглашела и же кажде хто жада донирац продукти у форми єдзеня, а хтори нє можу длуго стац, найлєпше же би то зробел на сам дзень базару. Тиж, визначела и же людзе хтори жадаю донирац свойо продукти, нє муша их на дзень базару предавац, за тото буду задлужени орґанизаторки.

Отримованє базару заплановане у термину од 9 по 15 годзин, у зависносци од того як ше швидко робу и услуги будзе предавац.

Дзивчата з тей нагоди поволую шицких жительох Керестура же би ше у цо векшим чишлє одволали и як донаторе продуктох и услугох, алє и як нащивителє базару 11. юния, а заинтересовани ше можу явиц даєдней од орґанизаторкох прейґ Фейсбуку.

ПОВЯЗАНИ ТЕКСТИ