Пестованє духовного живота

автор М. Горняк Кухар, фото О. Стецюк
113 Опатрене

ИНДЇЯ ‒ У Парохиї Успения Пресвятей Богородици, 2023. року покресцени два особи, винчана єдна пара и поховани два особи. Парох о. Михайло Шанта з тей нагоди прекоментаровал и стан, церковносц и духовни живот у тей заєднїци.

По його словох, у парохиї у Индїї єст кус вецей як сто фамелиї, а до 60 обисцох ходзи ше пошвецац. Гевти други лєбо нєактивни, лєбо су нє досц информовани, односно вообще нє приходза до церкви и уствари су нє познати. О нїх ше дознава прейґ других и сце ше дойсц и до нїх.

Цо ше дотика духовного живота, обачлїве же млади помали почали приходзиц. Влонї були кресценє и винчанє, цо велька радосц у парохиї. Кажда нова фамелия и особа важни и з тей нагоди мож буц задовольни.

Нове, то же концом прешлого и початком того року ришени проблем зогриваня церкви. У парохиї орґанизована акция збераня за апарат климу и тераз мож повесц же у церкви нє жимно. А на лєто будзе хладзиц. То мали, алє источасно и вельки крочай у орґанизованю и пестованю вирского живота у условийох у яких ше жиє.

Як гварел о. Шанта, наздаваю ше же тераз и дзепоєдни вирни приду дзечнєйше до церкви, односно частейше. Видно и же змена ґенерацийох, старших єст менєй, а зявюю ше младши и церква нє празна. Помали ше идзе напредок, з малима крочаями, алє у позитивним напряме.

ПОВЯЗАНИ ТЕКСТИ