Почала нова сезона

автор Л. Вереш, фото: А. Бечкеречки
727 Опатрене

ДЮРДЬОВ – У 1. колу Подручней фодбалскей лиґи Нови Сад, хторе одбавене 13. авґуста, фодбалере ФК Бачка 1923 зоз Дюрдьова, на домашнїм терену, бавели нєришено у стретнуцу зоз фодбалерами Фрушкогорца, а стретнуце закончене зоз резултатом 1:1.

Стретнуце добре почало за домашню екипу. Перши ґол на стретнуцу бул за Бачку, у 23. минути, цо дюрдьовским фодбалером дало мотивацию. Госци зоз Каменїци мали даскельо добри нагоди посцигнуц ґол, алє лабда по конєц першого полчаса нє затресла мрежу.

У другим полчаше нє було конкретни акциї анї за єдну, анї за другу екипу, шицко по 77. минуту кед фодбалере Фрушкогорца посцигли ґол и так виєдначели резултат.

После того кола Бачка на дзешатим месце на таблїчки зоз єдним бодом. У шлїдуюцим колу дюрдьовски фодбалере ше стретню зоз фодбалерами Футоґу.

ПОВЯЗАНИ ТЕКСТИ