НОВИ САД – У Новим Садзе ше од пиятку, 17. мая по штварток, 22. мая отрима 92. Медзинародни польопривредни саям, на хторим наступя вецей як 1000 викладаче зоз коло 40 жемох, сообщел Новосадски саям.
Того року 92. Медзинародни польопривредни саям, ношитель ознаки „Найлєпше з Войводини”, ма моцну потримовку Италиї як стратеґийного партнера Польопривредного сайма, хтора ше реализує дзекуюци Италиянскей аґенциї за вонкашню тарґовину (ITA/ICE).
Зоз тоту найвекшу аґробизнис подїю: Ґлобус осиґуранє – ґенерални спонзор, Ал Дахра – златни спонзор, Банка Поштанска шпоровня – Банка партнер, Министерство польопривреди, лєсарства и водопривреди, Покраїнска влада зоз секретариятами за польопривреду и привреду, Город Нови Сад и дародавец у дарунок-бависку Компания Ките ДОО.
Нащивителє котри буду мац купени уходнїци буду участвовац у дарунок-бависку, а найщешлївши достанє трактор Джон Дир 5045 Д, друнок Компаниї Ките ДОО, хтора урядови Джон Дир (John Deere) дилер и сервисер у Сербиї.
Того року, нажаль, нє будзе Национална вистава статку пре здравствени околносци у реґиону, а на основи препоруки Управи за ветерину Министерства польопривреди, лєсарства и водопривреди.
Саям за нащивительох будзе отворени од 9 по 18 годзин. Уходнїци пред початком и док будзе тирвац саям мож купиц онлайн, на касох ҐиґсТикса (GigsTix), а мож их поручиц и на сайту Новосадского сайма. Тиж ше их будзе предавац на касох Новосадского сайма док будзе тирвац Польопривредни саям.
