Пост и милосердиє за спашенє

автор М. Горняк Кухар
1.2k Опатрене

БЕОҐРАД ‒ У Беоґрадзе, на сиропусну нєдзелю, парох о. Иґор Вовк служел Службу Божу на хторей бешедовал о пребачованю грихох, о посце и о милосердию. На початку Литурґиї, присутни ше модлєли за мир на України.

Вон гварел же наш Спаситель Исус Христос у своєй поуки пост положел медзи пребачованє и милосердиє, прето же мержня и нємилосердиє понїщую плод поста. Дармо посци тот хто мержи свойого брата и дармо од своїх устох шпорує кажди хто руку милосердия нє дава бидним и худобним.

Алє тот хто пребачує ближнїм и хто помага так як може, вон добре стої пред Богом, спашує ше и тота драга го водзи до раю. Парох беоґрадски о. Иґор додал же пребачованє то характеристика моцних людзох и особох, а нє слабих.

На концу богослуженя Ґаврило Грбан з Управи за сотруднїцтво зоз Церквами и вирскима заєднїцами Влади Републики Сербиї, подзелєл вирним бомбони.

ПОВЯЗАНИ ТЕКСТИ