ШИД – На дзешатей схадзки Скупштини општини (СО) Шид, хтора отримана вчера, 8. фебруара одборнїки вигласали одлуку о концесийним акту за проєктованє, финансованє, вибудов и управянє зоз ґаражу и явнима паркинґами.
Тиж прилапени и звити о ступню ускладзеносци планованих и витворених активносоцох подприємствох ЯКП „Станадард“ и „ Водовод“ и Заводу за урбанизем, а прилапени и вименки статухох Народней библиотеки „Симеон Пищевич“ и Културно образовного центра.
СО тиж констатовала преставанє мандату одборнїчки Йовани Бакайлич, зоз лїсти Александар Вучич „Шид ютре“ и потвердзела мандат новей одборнїчки зоз спомнутей лїстини Валентини Живкович зоз Соту.
Одборнїки констатовали и задзекованє, пре здравствени причини, потерашнєй директорки Музею наївней уметносци „Илиянум“ Мариї Покаряц, а на тоту длужносц як о.д. до єдного рока, меновали Йовану Бакайлич.
СО тиж принєсла и вецей одлуки з обласци урбанизма зоз своєй компетентносци як и маєтно правних питаньох.
На початку схадзки, скорей прилапйованя дньового шора одборнїк опозици Зоран Шапоня гварел же дньови шор „нє одвитуюци“ и же би го требало прешириц з точками спрам актуалного стану у держави и општини, владаюца векшина тото нє прилапела и одборнїки опозициї такой нащущели скупштинске зашеданє.
