Просвитни надзорнїки надпатрали школи

автор В. Вуячич
81 Опатрене

БЕОҐРАД – Просвитни надзорнїки општински, городски, покраїнски и републични, вчера 22. януара надпатрали 84 основни и стреднї школи у хторих претаргнута настава. Надпатранє ше предлужує у школох у хторих часц наставнїкох блокирує наставно-образовни процес сообщело Министерство просвити.

З тей нагоди министерка просвити проф. др Славица Дюкич Деянович виявела же блокади у просвити нє предвидзени зоз законом и шицки цо у нїх участвую муша буц свидоми же поцагую пошлїдки у складзе зоз законом.

Найвекшу чкоду од блокади наставно-образовного процеса церпя школяре, бо пре нєотримованє настави дзеци нє здобуваю знанє, нє пририхтую ше за закончуюци испит на концу основного образованя и матурски испити на концу стреднього, гварела министерка и додала же Министерство вимагало од школох увид до плану надокнадзованя.

Министерка и спозорела же таки способ прериваня наставно-образовного процеса може мац пошлїдки и предлужованє школского рока и може уплївовац на орґанизацию примацих испитох за упис до специялизованих оддзелєньох ґимназийох и уметнїцкей школи, закончуюцого испита хтори плановане же будзе 16, 17. и 18. юния, як и отримованє матурских испитох у стреднїх школох, гвари ше у сообщеню Министерства просвити.

ПОВЯЗАНИ ТЕКСТИ