РУСКИ КЕРЕСТУР – Просториї и зоблєкальнї Фодбалского клубу „Русинˮ у Руским Керестуре пошвидко буду цалком реновирани. Вонкашнї и нукашнї роботи на тим обєкту уж у цеку, та з тей нагоди, роботи тих дньох обишли предсидатель општини Кула Дамян Милянич, предсидатель Месней заєднїци Михайло Пашо и предсидатель Клубу „Русинˮ Тихомир Медич.
Медич, за локални медиї визначел же є барз подзековни Месней заєднїци Руски Керестур и општини Кула, понеже праве їх найвекша заслуга за єдно таке подняце. Вон додал и тото же реновиранє у фази лїпеня цегелкох и билєня просторийох, у другей фази ше будзе класц ограду, а у трецей фази ше будзе робиц коло трибинох, понеже у плану збиц мури зоз трибинами.
Предсидатель општини Кула, Дамян Милянич, у обиходзеню роботох гварел же локална самоуправа з рока на рок видвоює вше векши средства за спортски колективи и їх инфраструктуру, и же ше уклада до спортских обєктох у каждим населєним месце.
