РУСКИ КЕРЕСТУР – Роботна акция посипованя рибарскей писти зоз зрипаним асфалтом, хтора почала 7. децембра, закончена того викенду.
Преход од моста по базен у Руским Керестуре, у длужини од коло 650 метери, тераз достал нови будовательни материял, та ше на тим месце блато вецей нє будзе правиц.
По дижджу, у соботовей роботней акциї, участвовали исти вредни волонтере з валалу як и прешлираз – члени рибарского здруженя „Колякˮ, домашнї огньогасци и волонтере поєдинци, а роботну акцию орґанизовала Месна заєднїца. Од механїзациї хасновало ше штири трактори зоз киперками за превоженє зрипаного асфалту, и два баґери.
За тот рок роботна акция закончена понеже шицок материял потрошени, а за нарок, кед ше достанє ище материялу, планує ше ушориц и горню часц писти.
Здогаднїме, материял достати од оструганого асфалту хтори ше знїмало кед ше нєдавно адаптовало драгу на Улїци Маршала Тита у Керестуре. Општина Кула теди купела 300 кубики того материялу, хтори наменєни за тоту рибарску писту, док ше 100 кубики похаснує за правенє помоцней дражки на Гиподроме.
Роботна акция тирвала од 9 по 11 годзин, а за учашнїкох у акциї, у пензионерским доме, по законченю бул обезпечени полудзенок.
