КОЦУР – У Велькей сали Дома култури у Коцуре пондзелок вечар, 19. юния школяре зоз Здруженя „Музични куцик” з Нового Саду отримали Рочни концерт на котрим представели свою роботу.
И того року ше зоз рижнима композициями класичней музики шветово познатих композиторох представели школяре Здруженя „Музични куцик”, Музичней школи зоз Вербасу, школяр Музичней школи „Йосип Славенски” з Нового Саду, рецитаторе, а зоз танцами програму прикрашели и дзецински фолклорни ґрупи Културно-уметнїцких дружтвох „Жатва” и „Завичайне врело” зоз Коцура.
Того вечара свойо схопносци на музичних инструментох указали Лана Нецич, Яна Бесерминї, Лана Дуґонїч, Наташа Фелбапов, Сара Горняк, Желько Шанта, Стефан Беґич, Ана Скакич, Миня Шкрбич и Йован Беґич, а зоз рецитациями у програми наступели Инес Абрагамски и Лара Ґубаш.
За Рочни концерт музични точки котри школяре виведли пририхтала руководителька Здруженя „Музични куцик” Каталина Мезеи, а у пририхтованю школярох участвовал и Акош Пап. На концу им Каталина винчовала успишно закончени школски рок, як и за успишни концерт котри числена публика випровадзела зоз моцним аплаузом.
