Рок авантурох

автор Л. Вереш
139 Опатрене

Єдна з причинох прецо так люби путовац то же на путованьох мож здобуц нових товаришох. Люби упознац историю и културу держави у хторей по тераз нє бул, алє тиж так ше люби видзиц зоз товаришами хтори у тей держави жию.

Путованя то нагода же би ше упознало швет, алє и же бизме ше лєпше упознали зоз собу. Виглєдованє нових кулурох, стретнуца зоз людзми зоз розличних крайох швета, и одкриванє нєпознатого приноши зоз собу нєпреценїве искуство. Денис Гарди, млади инжинєр зоз Ирскей, прешлого року путовал аж на три континенти, комбинуюци роботу и задовольство. Од Европи, прейґ Сиверней Америки до Азиї, його приповедка гутори о нєвичерпней жажди за виглєдованьом швета и зазберованьом памяткох за цали живот.

– У 2024. року сом перше одпутовал до Ню Йорку, до Зєдинєних Америцких Державох, у фебруару. Мам пайташа хтори жиє у Канади, та зме ше догварели видзиц ше на пол драги, з оглядом на тото же я жиєм у Ирскей, з хторей треба путовац шейсц годзини на авиону по Ню Йорк, а и йому исто тельо требало. Мушим припознац же до того пришло цалком случайно, нє плановали зме.

Чули ше ми двоме, вон ми гварел же идзе на концерт до Ню Йорку, та себе вец и я о пейц минути купел карту – започина Гардийов нашу розгварку.

Окрем же бул у Зєдинєних Америцких Державох, Денис у прешлим року нащивел и Исланд, Австрию, Луксембурґ, Французку, Горватску, Сербию, Шпанию, Нємецку, Италию, Турску, Азербейджан и Ґрузию, а барз люби путовац и по Ирскей.

Товаришства ключ за путованя

– Єдна з причинох прецо так любим путовац то же на путованьох мож здобуц товаришох як цо и я здобул у дзецинстве, а тиж и кед сом бул студент. Як студент сом участвовал на даскелїх Еразмусових проєктох, та сом ше так и упознал зоз велїма младима особами зоз цалого швета. Вшелїяк же любим упознац историю и културу держави у хторей сом до тераз нє бул, алє ше исто так любим и видзиц зоз товаришами хтори у тей держави жию. Любим путовац и вєдно зоз товаришами – приповеда наш собешеднїк, споминаюци и путованє до Бечу, до Австриї, на хторим участвовал на конференциї на хторей бул бешеднїк, а бешедовал о вплїву Еразмусу на млади особи:

– Поволали ме до Австриї же бим бул учашнїк на конференциї за младих. Я бешедовал о кратких, напредних Еразмусових програмох и зоз младима сом подзелєл свойо искуство зоз путованьох до Портуґалиї и Финскей прейґ Еразмус програми. На тей конференциї були штверо бешеднїки, алє кажде з нас мал цалком иншаке искуство, односно дожице и шицки зме бешедовали о тим яки вплїв тоти путованя маю на розвиванє професийного и особного живота студентох – виприповедал нам Денис.

Зоз Австриї ше Денис нє врацел до Ирскей, алє предлужел путовац до Горватскей у хторей є народзени, и Сербиї. Вон ма окремни гоби, а то виглєдованє свойого фамелийного стебла. Праве у Горватскей и Сербиї нащивел велї места у хторих жию Руснаци, як цо то Заґреб, Петровци, Пишкоревци, Дюрдьов, Вербас и Коцур. На тим кратким путованю ше наш собешеднїк упознал зоз велїма людзми, хтори з нїм дзечнє бешедовали на теми хтори го интересую и, як нам гварел, у Дюрдьове дознал вельо того о фамелиї Гарди.

Дестинация число єден – Ґрузия

Єдно з путованьох хторе нашому собешеднїкови остало у красним паметаню то кед путовал до Азербейджану, у хторим бул два тижнї. Денис там участвовал на конференциї як делеґат Европских младих инжинєрох. Окрем же участвовал на конференциї, мал вельо шлєбодного часу упознац тоту державу и културу людзох хтори там жию.

– У Бакуу, главним городзе Азербейджану, сом дожил цошка нєприємне. Найгорше цо ше може случиц єдному туристови у нєпознатей держави, у городзе котри ма пейц милиони жительох, то же би ше страцел, а батерия на мобилним телефону ше му випражнєла. Праве ше мнє то случело. Вошол сом до погришного автобуса и теди шицко пошло наспак. На улїчки сом пришол ґу єдному леґиньови, потолковал сом му цо ше случує, и замодлєл го же би ме унапрямел кадзи мам исц. Тот леґинь, чи ми будзеце вериц, чи нє, поволал такси, одпрова-дзел ме по готел у хторим сом бул змесцени и на концу нє сцел анї же бим плацел такси, бо я госц у його держави – здогадує ше Гардийов.

На концу нашей розгварки зме ше опитали Денисови хторе му путованє число єден у 2024. року, а вон нам гварел же то було путованє до Ґрузиї. Там пошол цалком случайно бо, пре почежкосци котри було на аеродрому, препущел авион до Истанбулу, а идуци бул о даскельо днї.

– Лєм кед ше здогаднєм путованя до Ґрузиї. Було стресу и панїки, алє ше ми на концу там найбаржей пачело. У Ґрузиї сом бул три днї, а нащивел сом Тбилиси, коштовал сом нови єдла и крашнє сом там вихасновал и препровадзел час. У Ґрузиї сом ше упознал зоз людзми зоз Дубаию, так же за мнє цалком важи гевто же: „Леґинь зоз малого валалу ше зоз шицкима може набешедовац” – закончує Денис нашу розгварку и поздравя нас шицких зоз Велькей Британиї.

ПОВЯЗАНИ ТЕКСТИ