РУСКИ КЕРЕСТУР – Коло 350 древка, точнєйше тополї, тих дньох посадзени у лєшику у Руским Керестуре, понеже древка хтори на истим месце посадзени пред трома роками, препадли. Же би до таких препущеньох вецей нє пришло, Општина Кула будзе донирац средства Огньогасним дружтвом по шицких општинских местох за отримованє, односно залїванє древкох.
Як потолковал секретар Месней заєднїци Михайло Пашо, акция полєшованя кулскей општини тирва уж треци рок, алє ше тераз у шицких општинских местох политика садзеня древкох пременї.
ЯКП „Руском” будзе мац задлуженє порихтац терен, викопац дзири, а розсаднїк хтори обезпечи материял за садзенє задлужени и посадзиц древка. Вони покладу и латочки коло древкох же би го защицели, а кед им помоц будзе требац повола ше и волонтерох з валалу.
Општина Кула будзе донирац средства Добродзечним огньогасним дружтвом у шицких местох нашей општини же би през лєто залївали посадзени древка, потолковал секретар, и додал же кед дахто обачи же ше нєзаконїто реже древа, же су нє засадзени на адекватним месце, або же древка завадзаю, шицко треба приявиц до Меснєй заєднїци. Тиж наглашел же ше древка найчастейше садзи на општинских поверхносцох, а кед дахто ма шлєбодну парцелу хтору нє хаснує, мож и на таким месце засадзиц древка.
