У новим „Руским слове”

автор А. Паланчанин
383 Опатрене

НОВИ САД – Двацецдруге число наших новинох на Тижньовнїку приноши звит зоз схадзки хтора отримана того тижня у Мисиї ОЕБС у Беоґраду, на тему проєктного софинансованя медийних змистох хтори од интересу за явносц. На сходу присуствовал и предсидатель Одбору за информованє Националного совиту Руснацох Златко Рамач.

У рубрики Нашо места обявени текст о преслави Дня Руснацох у Републики Горватскей, а наявени и Гуманитарни базар хтори будзе у Руским Керестуре на соботу 11. юния.

На бокох рубрики Култура и просвита обявени текст о преслави дня школи „Петро Кузмяк” и ювилею 270 роки образованя по руски у Руским Керестуре. У Коцуре представени найуспишнєйши школяре з Руского оддзелєня у Основней школи „Братство єдинство”. На бокох Економиї звит зоз 90. Медзинародного сайму польопривреди, як и тексти о проблемох продуковательох паприґи у Руским Керестуре.

Духовни живот приноши текст о майских случованьох у Водици. Рубрика Людзе, роки, живот приноши закончуюце предлуженє фельтону зоз паломнїцтва до Лурду, як и текст о учительки Еуфемиї Бесерминї хтора нєдавно наполнєла 90 роки живота.

У рубрики Спорт призначени турнир у одбойки хтори отримани у Дюрдьове у рамикох 32. Спортских бавискох „Яша Баков”. Призначени и успихи наших спортистох, а вшелїяк на першим месце стретнуца фодбалских клубох у предлуженю сезони.

На концу и рецепти у рубрики Горуци тепши з тей нагоди кухарки зоз Руского слова предкладаю торту зоз ягодами. У тим чишлє вишли и два додатки: Мозаїк и Дикица.

ПОВЯЗАНИ ТЕКСТИ