У Вербаше нова дочасова драга за превозку швидкей помоци

автор РТВ (З. Перович)
398 Опатрене

ВЕРБАС – На уходзе до ковид амбуланти у Вербаше направена нова дочасова драга за приход превозкох швидкей помоци.

Под час ковид пандемиї у Дому здравя „Велько Влахович” у Вербаше, способ роботи пременєни у складзе зоз епидемийнима мирами. Простор поливалентней патронажи бул найвигоднєйши и служел и ище вше служи як ковид амбуланта. Понеже до тей амбуланти авто швидкей помоци нє могол дойсц, мушелo ше направиц и дражку. Поверхносц на котрей пошата трава була импровизована драга по котрей преходзела превозка швидкей помоци. Медзитим нєсовисни гражданє котри приходза на препатрунки до Дому здравя паркирали авта на тей импровизованей дражки цо онєможлївело авту швидкей помоци же би привожел пациєнтох до ковид амбуланти.

Директор Дома здравя питал помоц од Явного подприємства „Комунялєц” же би ше по тей драги посипало шлюнок и направело дочасову драгу лєм за швидку помоц.

„Ми послали на терен баґер, котри пририхтал поверхносц и трозґу, котра википована, а роля поровнала терен. Ту потребне ище досц поробиц. Тото цо зме поробели то лєм гашенє огня и дочасове саниранє проблему, ту треба ище досц поробиц же би ше приведло до функционалного стану, же би було на хасен и Дому здравя алє же би було красне и пациєнтом котри муша приходзиц ту же би им ше дала примарна здравствена защита”, гварел директор ДЗ „Велько Влахович”.

Вон гварел же ше пошвидко будзе мушиц тирвацо ришиц тот проблем. Єдну часц поверхносци ше будзе асфалтовац, а на другей часци будзе пошата трава, паркиранє нє будзе дошлєбодзене та ше нє будзе губиц явни простор.

ПОВЯЗАНИ ТЕКСТИ