Унапредзенє сотруднїцтва и програми

автор А. Паланчанин
312 Опатрене

НОВИ САД – Предсидатель Националного совиту Йоаким Рац и предсидатель Вивершного одбор Желько Ковач вчера, 24. марца, нащивели Радио-телевизию Войводини. Привитал их о.д. ґенералного директора Йожеф Клем.

На сходзе з тей нагоди було бешеди о унапредзеню програми на руским язику, як и сотруднїцтва Совиту зоз войводянским явним сервисом. Як було поведзене, програма на руским язику єден од 16 язикох на хторим покраїнски явни сервис продукує и емитує програму. Руснаци го на своєй мацеринскей бешеди можу провадзиц на Другей телевизийней, односно Трецей радийскей програми Радио-телевизиї Войводини.

Як у розгварки наглашел предсидатель Националного совиту Руснацох Йоаким Рац, тирва конституованє Одбору за информованє нашого Националного совиту, та у наиходзацим периодзе будзе конкретизоване шицко цо порадзене на тим сходу. Циль, як визначене, же би ше поспишело и унапредзело потерашнє сотруднїцтво.

Сходу присуствовали главни и одвичательни редакторе Другей телевизийней програми Мирко Канюх, главни и одвичательни редактор Трецей програми Радия Воїн Попович, помоцнїца главного и одвичательного редактора Трецей програми радия Златица Няради, як и одвичательни редактор телевизийней, односно радио програми на руским язику Славко Орос и Мария Тот.

ПОВЯЗАНИ ТЕКСТИ