ЛИПАР/ЧЕРВИНКА – На општинским змаганю школох кулскей општини зоз хемиї, котре отримане 17. марца у Липару, Теодор Штранґар школяр осмей класи ОШ „Петро Кузмяк” з Руского Керестура достал диплому за 1. место у своєй катеґориї и директно ше пласовал на окружне змаганє котре будзе 14. априла.
На општинским ше з керестурскей школи змагали ище и Алекса Сопка, тиж з осмей класи котри завжал 2. место, и школяр седмей класи Исак Новта котри достал диплому за 3. место. За змаганє их пририхтала наставнїца хемиї Ясминка Надь.
Исти дзень, 17. марца, у Червинки отримане општинске змаганє за основни школи зоз биолоґиї, дзе тиж були успишни школяре Школи „Петро Кузмяк”. Дарко Еделински з пиятей класи посцигнул 3. место, як и Никола Петкович зоз шестей класи и обидвоме ше пласовали на медзиокружне змаганє 14. априла, а Доротеа Рамач тиж школярка шестей класи достала подзекованє.
За змаганє их пририхтовала наставнїца биолоґиї Єлена Шомодї.
