КОЦУР – Ловарске дружтво „Сокол” зоз Коцура всоботу, 17. януара, орґанизовало Ловарски бал котри бул отримани у Пелетовей сали.
Того вечара ше баловало вецей як 150 госцох, як зоз Коцура, так и зоз других околних местох – зоз Савиного Села, Змаєва, Вербасу, Кули, Дюрдьова, Нового Саду, а було ловарох и зоз Краґуєвцу и Ариля. Окрем госцох зоз околїска, и члени вецей валалских здруженьох и дружтвох пришли потримац ловарох и розвешелїц ше.
Зоз пригоднима словами предсидатель Ловарского дружтва „Сокол” Любомир Тамаш привитал госцох и пождал им приємни вечар и же би ше ище велї роки так баловали.
Орґанизаторе за тот вечар, окрем смачней паштети и юшки зоз фазана и ловарскей вечери, пририхтали и богату томболу. Вредни и интересантни дарунки обезпечело Ловарске дружтво, а томболи даровали и числени спонзоре. Вкупно було коло 80 награди за госцох. Було ту богати пакети з валалских месарох, препарати за польопривреднїкох, вредни награди як ловарска якна и ловарски кошулї, а орґанизаторе даровали и котизацию за „Ловарски котлїк”, як и карти за шлїдуюци Ловарски бал. Главна награда, бициґла, остала у Коцуре при Валентини Будинсковей.
За добре розположенє и забаву госцох и на тогорочним балу були задлужени „Коцурски бетяре”, а весела атмосфера, шпиванка и танєц тирвали до позних годзинох и були знак ище єдного успишного коцурского Ловарского балу.
