РУСКИ КЕРЕСТУР – Традицийни 17. Паприґарски бал, отримани пияток, 10. фебруара у керестурским ресторану „Бостон”. Бал мал окреме богату томболу у вредносци коло 600.000 динари, а баловало ше коло 190 госцох.
Паприґарски бал того року першираз орґанизовал нови орґанизацийни одбор у котрим Славко Надь, Янко Планчак, Сани Колошняї и Сашо Фаршанґ зоз супругами, а зачатнїком того балу пред 17 роками у хторим були супружнїки Душица и Михайло Оросово, Наталия и Михайло Рацово, Мелания и Микола Винайово, Еуфемия и Владимир Оросово та Дюра и Иринка Нярадийово, нови одбор окреме подзековал и зоз пригодну памятку.
Баловали ше углавним керестурски паприґаре и їх госци, у веселей атмосфери и танцу, а до двох годзин по полноци их забавял „Евробенд” зоз Лалитю.
По словох єдного з орґанизаторох Славка Надя, уходнїца за бал коштала 2.500 динари, а за госцох вони обезпечели богату томболу, у вкупней вредносци коло 600.000 динари. Половку обезпечел орґанизацийни одбор, а другу половку числени спонзоре, керестурски тапетаре, та други векши и менши подприємства з валалу, як и нашеньски и хемийни хижи.
Награди на томболи були наисце вредни, а найвреднєйшу – ґарнитура орманчикох за дньову жиху достала Андреа Сивч.
