НОВИ САД – Покраїнска влада принєсла одлуки зоз хторима утвердзени квоти за упис студентох на перши рок основних фахових, академских и интеґрованих студийох хтори ше финансує зоз буджету АП Войводини на факултетох Универзитета у Новим Садзе, як и на високих школох фахових студийох хторим снователь АП Войводина.
Утвердзени квоти и за буджетски места за упис на перши рок мастер и докторских академских студийох на факултетох Универзитета у Новим Садзе, и за перши рок мастер фахових студийох на високих школох хторим снователь АП Войводина, сообщене зоз Покраїнскей влади.
На перши рок основних фахових, академских и интеґрованих стуйох, хтори ше финансую зоз буджету АП Войводини на факултетох Универзитета у Новим Садзе, у школским 2024/2025. року уписац ше годзен 5.651 студент.
На першим року мастер и докторских студийох на финансованю зоз буджета АП Войводини на факултетох Универзитета у Новим Садзе у новим школским року предвидзени 2.944 буджетски места.
На першим року студийних програмох основних фахових студийох на високих школох фахових студийох хторим снователь АП Войводина у школским 2024/2025. року, на буджету бдузе 1.021 студент, а на перши рок мастер фахових студийох на високих школох фахових студийох хторим снователь АП Войводина годно ше уписац 32 студенти.