Прешол ище єден фестивал тамбурових орхестрох „Мелодиї Руского двору“ у Шидзе и вшелїяк же остане запаметани же є 18. по шоре, же наступели лєм три орхестри, рахуюци и домашнїх и же фестивал бул ревиялного характеру.И попри спокуси хтора ше случела зоз меншм числом орхестрох и же нє було оценьованя анї з боку фахового жирия анї з боку публики, фестивал вшелїяк оправдал свойо иснованє и потребу за єдним таким фестивалом. Нє було лєгко анї кед ше рушало пред 18 роками.
Добра руска шпиванка и музика и з тей нагоди одгуковали з порти Лєтнєй владическей резиденциї у виводзеню Шидяньох, Дюрдьовчаньох и Керестурчаньох.Добре росположенє присутней публики то и потвердзело. А вец их окреме забавел и розвешелєл „Касиюс бенд“ з Руского Керестира хтори указал же ше руска музика и шиванки годни вивесц и „у обробку“ и же зоз осучасньованьом нїч нє траца.
Орґанизатор КПД „ Дюра Киш“ и з тей нагоди уложел досц роботи и креативносци же би и тот фестивал бул удатни. Допомогли и жени зоз Здруженя „Маря“ зоз єдну одличну виставу стариох фотоґрафийох, документох, предметох, ручних роботох…Тиж були и порихтани етно штанди здруженя женох як и каждого року. А послужела и вигодна хвиля за учашнїкох и публику так же шицки уживали.
Фестивал дожил свойо полнолїство и по тераз мал одредзни пременки як у концепцїи так и у терминох отримованя. Перши отримани концом мая мешаца потим фестивали отримовани и початком авґуста та аж и у першей половки септембра,а вец штредком юния. Руска шпиванка и музика остали,а то найзначнєйше. Уживала публика нє лєм зоз Шиду алє и зоз околних местох,а то найзначнєйше бо ше пре нїх фестивал и отримує. И кед ше на концу шицко спатри, орґанизатор КПД „Дюра Киш“ най будзе задовольни же прешол ище єден фестивал хтори бул удатни и же нє вше число орхестрох або змаганє –найважнєйши. Покля єст публики, будзе и фестивала.