НОВИ САД – Тих дньох вишло фебруарске число часопису за дзеци „Заградка”, хторе у рубрики Госци и новосци обвисцує Заградкарох о тим цо ше случовало прешлого мешаца, а рубрика Сцеме знац и упознац представя талантовани ґлумици зоз новей дзецинскей представи „Бал”, хтори и на насловним боку тей „Заградки”.
У Читальнї праве виривок тексту спомнутей театралней представи „Бал” автора Сашу Палєнкаша, чийо предлуженє будзе у марцовским чишлє, док Мала заградка понука приповедку у сличкох, писньочки за наймладших, як и квизчок.
За фебруарску „Заградку” сцигли 90 подобово и писмени роботи дзецох зоз вецей местох и даєдни з нїх мож найсц на вецей бокох у тим чишлє. Солмизация дава ноти и текст єдней дзецинскей шпиванки вочи 8. марцу, док рубрика Мудро и безпечно пише о интернет бонтону.
У новей рубрики, Радио у Заградки, хтору ше од того року реализує у сотруднїцтве зоз Емисию за дзеци Рускей редакциї Радио Нового Саду, водительки Леа и Анамария Ранкович писали о животиньох.
На Забавних бокох мож ришовац и виполньовац вецей задатки, а рубрика Питаня и толкованя дава даскельо интересантни факти и питаня.
Хто ше у 2023. року сце предплациц на „Заградку”, треба же би послал мено, презвиско и адресу на мейл zahradkacasopis@gmail.com, лєбо ше явиц до поруки на дружтвених мрежох Zahradka Casopis. Рочна предплата 1 000 динари.