НОВИ САД – Тих дньох вишло априлске число МАК-у, а у нїм у рубрики „У фокусу” мож пречитац о найновшим Пактовим подкасту „До Пакту на кафу” хтори водзи Виктор Хрин, Мария Горняк з Дюрдьова подзелєла свойо искуство зоз змаганя у бешеднїцтве на хторим освоєла 1. место, мож пречитац и кратку розгварку зоз Машу Керекеш з Кули хтора тиж освоєла 1. место алє на Републичним змаганю зоз аґенцийного и готелиєрского водзеня роботи, а у фокусу нам и вистава фотоґрафийох Михайла Планкоша зоз Суботици.
У рубрики „МАК-ов колаж”, Ванеса Медєши стандардно предлужує писац цалорочну астролоґийну проґнозу, у тим чишлє за особи народзени у знаку Козака, Водолєя и Риби, а у рубрики „Драгописиˮ Адриана и Борис Барново пишу о своїх упечаткох зоз путованя на Занзибар.
У спортскей рубрики, Лидия Вереш направела розгварку зоз фодбалером Клубу „Бачка 1923” Илийом Данґубичом зоз Дюрдьова, „МАК-ов лексиконˮ у априлским чишлє виполнєла Кристина Афич, а Мартина Надь за „Мозаїк” направела розгварку зоз орґанизаторами першого фестивалу духовней музики, Павлину Шепински и Александром Планкошом.