Руснаци у Републики Сербиї маю єдну окремну чесц на початку каждого року. Швета хтори починаю концом старого и тирваю и на початку нового року шицким хтори ту жиєме за Руснацох ше предлужую дзекуюци нашому Националному швету. И гоч пракса преславйованя Швета нє тирва длуго (од 2008. року), бул му потребни барз кратки час же би зажил у нашим народзе. Локални преслави по наших местох у орґанизациї наших здруженьох и установох и подручних канцеларийох Националного совиту постали наисце нащивени, а рихтанє на драгу пре нащиву Централней преслави постало права єдна национална традиция. Швето зме почали винчовац єдни другим, а припаднїки других народох дзечнє нам го винчую з найкрасшима жаданями. Як цо други вирски швета през жиму швециме дома и у рамикох своєй фамелиї, тоту преславу запровадзуєме у дружтве, з припаднїками свойого народу.
Як цо уж познате, Централна преслава Националного швета Руснацох у Републики Сербиї того, 2025. року будзе отримана у Сримскей Митровици. Слово о найюжнєйшей историйней заєднїци бачванско-сримских Руснацох зоз своїма окремнима специфичносцами. Без огляду на шицки виволаня хтори маю меншински заєднїци у городох у отримованю власного идентитету, митровицким Руснацом ше удало зачувац свою етнїчну и релиґийну припадносц, а остатнї два децениї поднєсли и значни крочаї на розвою културно-просвитного живота. Члени митровицкого Дружтва Руснацох нєдавно ожили свою дїялносц и през роботу мишаней шпивацкей ґрупи и на шветочней академиї представя резултати своєй потерашнєй роботи. Руска заєднїца у Сримскей Митровици тиж ма и значне число академски образованих музичарох хтори ше тиж укажу у тогорочней програми.
По уж опробованим „рецепту”, преслава почина зоз Архиєрейну Службу Божу у месней Грекокатолїцкей церкви Вознесения Господнього, дзе з нашим владиком обчекуєме вельке число наших священїкох зоз жеми, а можебуц и зоз иножемства. После етно-стола за нащивительох хтори у парохиялней сали порихта Здруженє женох „Бикичанки”, прейдземе до Святочней сали Музичней школи „Петар Краньчевич” дзе Новинско-видавательна установа „Руске слово” отрима Усни новини по першираз у тим городзе. Тоти усни новини ше орґанизую и з нагоди двох окреме значних ювилейох: 100-рочнїци „Руских новинох” и 80-рочнїци „Руского слова”. Вистава подобовей уметнїци Ясни Арбанас под назву „Мальованє сримскей цихосци” у голу Театра „Добрица Милутинович” нащивительох на красни способ порихта на тото цо ше рихта у Велькей сали, а то Шветочна академия на хторей ше укаже синерґия домашнїх зоз Сримскей Митровици и найвизначнєйших руских музичних и сценских интерпретаторох.
У моментох кед ше находзиме у закончуюцих фазох процесу орґанизациї Швета, сцел би сом подзековац шицким членом Орґанизацийного одбору, а окреме предсидательови Дружтва Руснацох зоз Сримскей Митровици Владимирови Балащакови чия безгранїчна енерґия и креативносц були мотор-порушовач цалого поступку орґанизованя тей преслави. Праве тота заєднїцка сила хтору формую искусни тим Заводу за културу войводянских Руснацох и представителє домашнїх, рускому народу пририхтала шицки тоти нашо швета. Праве прето поволуєм шицких Руснацох и їх почитовательох же би на соботу, 18. януара, пришли до Сримскей Митровици, и вихасновали нагоду обисц єден город велького туристичного потенциялу, и опатриц тото цо за нїх їх сонароднїки порихтали.