РУСКИ КЕРЕСТУР – Тих дньох ше врацели 16 школяре напряму туристично-готелиєрски технїчар Штреднєй фаховей школи „Петро Кузмяк” зоз двотижньовей фаховей пракси у Солуну дзе пребували од 6-20. марец.
Провадзели их професорки Анико Войчена и Рената Зорич, а фахова пракса ше витворела през Еразмус плус програму мобилносци школярох фахових напрямох.
За туристични напрям керестурскей Школи то бул други рок успишного сотруднїцтва зоз хост партнером „Иподоми центром за цаложивотне ученє” зоз Солуну, котри у сотруднїцтву зоз школским проєктним тимом мал улогу орґанизатора.
Школяре двотижньову праксу мали у трох хотелох у Солуну, дзе роботни задатки окончовали у рамикох служби на поверхох, служби за костиранє и рецепцийней служби. Кажди дзень и през викенди мали нагоди нащивиц знаменїтосци Солуну и його околїска. То була нагода и же би ше дзепоєдни опробовали у улоги туристичного водзача.
По законченю пракси шицки школяре достали сертификати, а були похвалєни за закладанє, схопносц и указане намаганє.
