РУСКИ КЕРЕСТУР – Здруженє женох „Байка” вчера 26. фебруара отримало свою 12. рочну Скупштину на котрей предсидателька Славица Катона винєсла звит о роботи у 2024. року як и план за тот рок.
Здруженє влонї витворело два свойо проєкти, т.є. першираз витворени проєкт роботи зоз глїну наволани Знанє то моц котри бул барз успишни и през три роботнї позберал коло двацец жени.
Традицийна Байкова манифестация Домашнї шпайз того року отримана у двох терминох и була як и вше крашнє нащивена, а паралелно отримани и роботнї за дзеци вязани за стари ремесла.
„Байка” и у 2024. року активно участвовала на шицких манифестацийох и подїйох у Керестуре, општини, та и звонка, дзе зоз своїма продуктами и виробками або стародавнима єдлами доприноши чуваню рускей култури, традициї и кухнї.
Финансийни звит винєсла касир Наталия Емейди, а вон витворени так же шицки достати средства у суми 250.000 динари були наменски за спомнути проєкти и так су и потрошени.
Подобни плани Здруженя и за 2025. рок, а понеже ше членство осипало пре обєктивни причини, а младши ше нє так одволую, спрам терашнїх моцох редуковани и власни Байково проєкти.