РУСКИ КЕРЕСТУР – Пре зменшованє популациї суньоґох, та и охрани од потенциялного вирусу Заходного Нилу, новосадска „Циклонизация” ДДД (дезинсекция, дератизация и дезинфекция), випоручела безплатни БТИ таблети процив суньоґох котри мож достац у просторийох Месней заєднїци Руски Керестур.
ДДД „Циклонизация” у рамикох тогорочней системскей акциї „Защиц ближнїх – виключ зуянє” за охрану здравя гражданох, дзелї безплатни БТИ таблети, котри наменєни за знїщованє ларвох суньоґох на влажних местох, по обисцох, пиньвицох, септичких, цивох за дижджовку и других менших поверхносцох дзе ше вода затримує.
БТИ таблети високо селективни биоцидни продукт котри дїйствує лєм на ларви суньоґох. Наменєни су за хаснованє лєм у обисцох дзе єст стояцей води, котра ше затримує длужей як седем днї.
Єдна таблета наменєна за 200 литри води, а з количества єдного погара води, за седем днї ше можу вилягнуц и даскельо стотки суньоґи.