СВИДНЇК (СЛОВАЦКА) – Уж длугши час валали у сиверовосточней Словацкей нащивює Библиобус – путуюца библиотека Поддуклянскей библиотеки зоз Свиднїку, и як сайт русинФОРУМ преноши писанє тамтейших новинох „Корзар”, тота рухома библиотека барз популарна медзи валалским жительством.
Руководитель Поддуклянскей библиотеки у Свиднїку Камил Бенко гвари же проєкт Библиобус почал ище 1993. року, перше з финансийну потримовку Голандиї и словацкей держави, а тераз то з Прешовского самоуправного краю.
Библиобус обиходзи оддалєнши места у двох округох – свиднїцким и стропковским, односно аж 69 валали. Зпочатку мали два автобуси, а тераз лєм єден, уж 23-рочни, та го треба заменїц з новшим, гварел Бенко.
Члени Библиобусу найвецей школяре ОШ, алє и штредня ґенерация и пензионере, аж мали єдного вирного читача котри до 94-ох рокох свойого вику поряднє нащивйовал Библиобус, а тота рухома библиотека заходзи и до малих местох у польским погранїчу, за цо им читателє барз подзековни.