Просториї котри хаснує Месни одбор Здруженя пензионерох у Руским Керестуре вше полни, ту керестурски пензионере препровадзую шлєбодни час. През друженє, розвагу, розгварку и рижни дружтвени бависка преходзи кажде их предполаднє.
Шицко дзекуюци добрей поради и орґанизованосци, ту и толерантносц и порозуменє за каждого. Можебуц дахто дума же то таке дацо подобне як карчма, алє напроцив, просториї у Доме пензионерох ше хасную у правим смислу − насампредз за їх друженє.
Пензионерох у валалє єст коло 1 000, з того числа коло половка и члени, дзепоєдни менєй, або вецей активни, алє у Доме су шицки вше привитани. Праве прето ше кажде о Доме стара як о своїм доме, можебуц и баржей. Так на приклад у просторийох забранєне куриц, и то ше почитує, шицки виходза вонка. О просторийох ше стара домар Янко Катона, котри позна каждого члена.
КАРТАНЄ ПРЕЗ ЦАЛИ РОК
Як уж длугорочни обичай наклада, три столи у Доме пензионерох кажде предполаднє забераю три ґрупи хлопох котри ше картаю, нє лєм през жиму, алє през цали рок, и як нам потолковали нїґда за пенєжи. Кажда ґрупа ма свой стол, кажди хлоп свойо место и одредзени час кеди ше зиходза. Кед же даєден нє придзе, там и замена. Найчастейше ше картаю зоз мадярскима картами мексико, або рамшлу, зна ше хто пише и хто одноши побиду. Можебуц орґанизованше и од професийних казинох, алє вше зоз цильом розваги. Так картанє у Пензионерским доме заходзи до високих схопносцох и поставяня питаня же кому би ше удало надкартац искусних пензионерох?
З тей нагоди, кед зме прешлей соботи нащивели Дом, єдна ґрупа ше уж картала, друга праве шедала за стол, а треца ше ище нє зишла, вони приходза кус познєйше, гваря нам присутни.
За першим столом ше картаю, Йовґен Папуґа, Тихомир Маркович, Юлиян Ковач и Владимир Югик котри ту з часу на час, а нєшка меня Юлина Джуньового. Яким Папуґа и Любо Фечов з тей нагоди лєм публика.
За тим столом найдлугши пензионерски стаж ма Йовґен Папуґа котри пензионер уж полни 24 роки, тельо и ходзи ше ту дружиц, вше кельо найдзе часу, бо, як гвари, єст обовязки и коло обисца.
Пензионер, чия приповедка приходу до нашого валалу цалком нєзвичайна то Тихомир Маркович, а однєдавна ше и вон карта.
− Я ту у валалє як национална меншина, приходзим однєдавна скоро каждей соботи, ту предавам мой мед, та мам обовязку и присц подружиц ше. У Руским Керестуре жиєм полни 54 роки, пришол сом з Беоґраду на одпочивок без бутєлара, ту сом достал роботу директора у „Першим маю”, квартель, а и оженєл сом ше, так сом ту остал. Наисце сом задовольни у Керестуре − приповеда през франту Маркович.
Пейцрочни пензионерски стаж ма Юлин Ковач, майстор котрого шицки познаю як Киду.
− Я ту ”швижи”, стаємна зме екипа за картанє, розробел сом свою тактику за побиду. Картаме ше през цали рок, з часу на час през лєто пойдземе на беґель або на Дунай лапац риби, алє зме углавним у нашим Доме − гвари Ковачов.
За другим столом ше картаю Владо Бучко, Владимир Керґдярто, Михал Колошняї, Любомир Надь и Здравко Обрадович. То тиж нє стални состав екипи, двоме у замени, алє мож повесц же и замени стаємни бавяче.
Найдлугши стаж у Пензионерским доме ту маю Кереґдярто и Надь котри ту уж вецей як 20 роки.
− Патрим присц кажди дзень, вше кед можем. Єст уж осем роки як сом пошол до пензиї, а тераз уж меням брата Дюру котри вше ридше ходзи на картанє − толкує Бучко.
У терашнїм составе ше карта и Здравко Обрадович котри у Керестуре жиє дзеветнац роки, а медзи иншим о Руснацох ма лєм красне слово повесц. Евиденция о побидох ше прави каждого дня, алє ше ю нє чува, кажди дзень єдна нагода за нового побиднїка.
Попри учашнїкох у картаню, коло стола шедза ище тельо, як вони за себе гваря кибицере. Ту ше здогадую на младосц, приповедаю цо єст нове у валалє, хто кельо мал адути, яки штих и под, алє нам потвердзую же спреводзки нєт.
Медзи нїма приповедки рижнородни, єден препутовал пол швета, други робел у швеце, ту и локални парасти, майстрове, ґаздове… За шицких єст вше места, а найбаржей ше радую кед треба направиц места за ище єден карсцель.
ЛЄМ ЗАВИДЗИЦ НА ТАКЕЙ ОРҐАНИЗАЦИЇ
Месни одбор Здруженя пензионерох у Руским Керестуре мож видвоїц по тим же функционує на завидним уровню, без стаємних порядних средствох приманя вони ше знаходза на рижни способи, алє ше видзелюю спомедзи шицких здруженьох як найсхопнєйши за обезпечованє средствох финансованя. Їх модел єдинствени, алє на тельо розробени же су способни себе обезпечиц шицко. З добру дзеку и упартосцу Управи и членох, вони шицко ришую.
− Поряднє ше уклада до просторийох, вше ше остараме же би нам було чисте и обилєне. Половка будинку нам изолована зоз стиропором, а наздаваме ше же другу половку поробиме цо скорей. Нєодлуга будзе ришени и проблем зогриваня, пец за етажне зогриванє зме достали як донацию, а єден наш член пороби шицко цо потребне за приключованє на систем централного зогриваня котри ше роками нє хаснує – толкує предсидатель Здруженя Ярослав Малацко, и предлужує же нє доставаю нїяки средства за порядну дїялнсц зоз локалного буджету, а од кеди утаргнути самодопринос, вони остали и без того. Приходую лєм зоз членарини котра символична, як и зоз донацийох котри доставаю од привреднїкох котрим су поштреднїки у предаваню їх продуктох.
Найвецей и найвекши роботи на своїм Доме поробени на рижних роботних акцийох до котрих ше уключую члени.
Орґанизаторе су вецей як 30 рижних активносцох през цали рок, дзечнє ше одволую и на роботни акциї, маю слуха за своїх членох, а сотрудзую зоз шицкима. З нагоди Дня планети жеми привитую наймладших школярох и оводарцох котри за нїх пририхтую програму.
Попри тим поштреднїки су у предаваню вецей артиклох, дзечнє помагаю и совитую коло безплатних одходох до купельох и способох витворйованя пензионерских правох.
ЧАСТО ШЕ ВАРИ И ПОЛУДЗЕНОК
Стаємни пензионере з часу на час, на идею поєдинцох орґанизую и варенє полудзенку. Так у поради, даскельо раз до мешаца ше зложа и уваря пасулю, дзе кажде участвує зоз исту суму пенєжу. Як дознаваме, нєдавно ше наскладали и купели праше котре упекли у пекарнї, та у Доме була права госцина.
ДОМ ОТВОРЕНИ ШИЦКИМ
Членарина символична, алє интересантне же ю велька векшина плаци, праве прето же су свидоми же то средства котри ше вихаснує там дзе треба. Попри тим, привитани шицки пензионере котри ше сцу дружиц, а нєписане правило гвари же дополадня хлопи, а пополадню жени. Жени нє таки заинтересовани и приходза у меншим чишлє, алє интересантне же су у Управи наисце активни.
