НОВИ САД – Вчера вишло остатнє число часопису за младих МАК за тот рок, а „У фокусу” того, децемберского числа 8. Литературни вечар младих у Дюрдьове, як и Михайло Планкош зоз Суботици, аудио-визуални уметнїк и студент историї уметносци.
„МАК-ов колаж” пише о тим як настал музични проєкт „Час любови”, а „Упечатки” о промоциї мастер роботи Биляни Дражович. „Швет науки и технолоґиї” представя Николу Сивча зоз Крущичу, студента мехатоники, роботики и аутоматизациї, радийского водителя, фриленсера, а „Спорт и рекреация” танєчнїка латино-америцких танцох Славка Колошняя з Керестура.
У рубрики „Упознай себе” совити о шминканю, а „Власни печац” понука поезию двох младих авторкох.
Кед ше сцеце предплациц на МАК у 2019. року, пошлїце мено, презвиско и адресу на mak.magazine@gmail.com, на Фейсбук – MAK MAGAZINE, лєбо Инстаґрам – mak.magazine. Рочна предплата 1 000 динари.