КОЦУР – У рамикох Дньох театру „Владимир Сабо-Дайко”, всоботу у Доме култури у Коцуре одбавени два представи – „Цифровани яблука” Драмского студиа АРТ з Руского Керестура и „Нєлапшни Алибаба” КУД „Дюра Киш” зоз Шиду.
Як визначела режисерка представи „Цифровани яблука” Ксения Бодянєц, премиєра представи була на Драмским мемориялу Петра Ризнича Дядї, прешлого тижня є репризно одбавена у Керестуре за родичох и родзину, а тото у Коцуре було перше госцованє, чому ше дзеци ґлумци окреме радовали.
Панїматка Наташа Еделински Миколка, хтора прекладала текст и участвовала у орґанизованю представи „Нєлапшни Алибаба”, тиж визначела же дзеци любя одпутовац даґдзе же би одбавели представу, а у представи ґлумя дзеци з аж штирох местох.
Режисер представи Цветин Аничич гварел же з Дружтвом „Дюра Киш” уж успишно сотрудзовал, алє на тот завод першираз з дзецми, цо им була нагода же би лєгчейше звладали руски язик.
