РУСКИ КЕРЕСТУР – У обисцу, на улїци Маршала Тита ч. 100, вчера коло поладня вибил огень у топнїку коло пеца за централне зогриванє, а дзекуюци интервенциї огньогасцох домашнього Добродзечного огньогасного дружтва успишно є загашени за два годзини.
Коло пеца з хторого вибухнул огень влапели ше и згорели 25 бали соянки порихтани за топенє, а дзекуюци тому же ґазда бул дома и обачел, огень ше нє преширел, та материялна чкода нє велька.
Огень гашели огньогасци Владимир Голик, Владимир Штранґар, Михал Надь и Йоаким Рац. Вони з тей нагоди спозорюю гражданох же опасне огриву зохабяц блїзко при пецу односно у просториї за топенє.
До помоци керестурским огньогасцом хтори маю на розполаганю лєм 2 000 литри води, поволана и професийна єдинка зоз Оджаку алє, на щесце, вона нє мушела интервеновац.