За школярох конкурс „Мост порозуменя – медзиґенерацийна солидарносц“

автор мар
874 Опатрене

БЕОҐРАД – З нагоди наступного Медзинародного дня старших особох (1. октобер), Поверенїк за защиту ровноправносци розписал конкурс за найлєпшу литературну роботу, подобову роботу и фотоґрафию з тему  „Мост порозуменя – медзиґенерацийна солидарносц”. У шицких трох катеґорийох буду додзелєни перша, друга и треца награда.

На конкурс ше можу приявиц школяре и школярки 6, 7. и 8. класи основних школох з Републики Сербиї, же би на задату тему виражели свойо становиско же роки нє шму буц препреченє за достоїнствени и квалитетни живот, и же би на тот способ допринєсли борби процив дискриминациї старших у дружтве.

Термин за посиланє роботох 20. септембер того року, а єден учашнїк и учашнїца можу послац по найвецей три роботи з каждей катеґориї. Роботи муша буц ориґинални и самостойни, будзе их оценьовац фахови жири, а награди буду шветочно уручени у Народней скуштини Републики Сербиї у Беоґрадзе початком октобра.

Роботи на конкурс треба посилац на е-адресу: poverenik@gmail.com, лєбо по порядней пошти на адресу: Поверенїк за защиту равноправносци, Булевар краля Александра 84/4, 11000 Београд.

Конкурс у цалосци мож опатриц на сайту: ravnopravnost.gov.rs, а потримує го Фондация за отворене дружтво.

ПОВЯЗАНИ ТЕКСТИ