КАМЮНКА (СЛОВАЦКА) – У ТВ-емисиї Явней радио-телевизиї Словацкей (РТС) „Най валал Словацкей”, односно по гласаню патрачох, за най валал у Словацкей вибране и нам добре познате русинскe место Камюнка, хторе ше находзи у округу Стара Любовня Прешовского самоуправного краю.
Продукция РТС того року штварти раз през лєто орґанизовала тото представянє-змаганє валалох у Словацкей. Места ше приявйовали ище од фебруара, а спатрало ше по чим єден валал найлєпши за живот його жительох, алє и його интересантносци за туристох и одпочивок, тиж и историят и сучасносц.
З прияву, валали мушели придац и мотивацийне писмо, у хторим и потвердзенє же кандидатуру потримує и староста места, а до змаганя були уключени шицки структури места, здруженя, орґанизациї, младеж…
У явних знїманьох, а у Камюнки ТВ-знїманє було 14. и 16. юлия, жителє окончовали рижни задатки поєдинєчно, фамелийно, ґрупно, а у финалу дати задаток мало окончиц цо векше число жительох места.
Емисия о Камюнки на РТС була емитована 11. авґуста, а службени резултати гласаня патрачох прейґ СМС сообщени 4. септембра. Жителє Камюнки достали найвецей гласи, так же су преглашени за „Най валал у Словацкей”, на чим патрачом у Словацкей подзековал и староста места Юрай Єдинак.
Камюнчанє ше указали и виказали зоз своїма русинскима характеристиками, а у тим финалним змаганю дзе мушело участвовац цо векше число людзох, на площи у центре места направели вельки надпис з меном свойого валалу з ткв. камюнских пирогох.