СЕРБИЯ/БЕОҐРАД – У наступним периодзе почнє санкционованє вожачох хтори буду вожиц швидше од допущеней просековей швидкосци на авто-драгох, виявел директор полициї Владимир Ребич.
Министерство нукашнїх дїлох, у сотруднїцтве з Явним подприємством „Драги Сербиї”, уж запровадзує проєкт мераня просековей швидкосци автох по авто-драгох. На основи часу преходу през наплатни рампи, т. є. интервалу од-до, вожаче з фискалним рахунком за наплацованє надополнєня за драги, доставаю и информацию о просековей швидкосци, кед же є векша од допущених 120 километрох на годзину.
– У тест-фази проєкту, вожаче котри вожели швидше од допущеного, доставали информацию о просековей швидкосци, алє тоти потупеня нє буду санкционовани – виявел Ребич, та дополнєл же тота система лєм єден од способох за зменшованє числа жертвох и звекшанє безпечносци на драгох котри запровадзує Министерство нукашнїх дїлох.
– По Закону о безпечносци у транспорту, нєодлуга почнє наплацованє карох за таки потупеня, та полицає буду застановйовац вожачох такой на наплатних рампох, або буду посилац прияви на адресу вожача – заключел директор полициї Ребич.
Цали проєкт потримало ЯП „Драги Сербиї”, котри модернизовали и усовершели свойо системи за меранє и прераховйованє податкох.