КУЛА – Здруженє за помоц ментално нерозвитим особом „Белава птица” („Плава птица”) з Кули, односно єй обєкт за биванє одроснутих „Оддих” („Предах”), од Општини Кула достало нову комби-превозку прилагодзену хасновательом Здруженя. Превозку предсидательови Здруженя Маркови Кошутичови и хасновательом на Вилїю по юлиянским календаре придали предсидатель Општини Кула Перица Видеканїч, руководителька Оддзелєня за дружтвени дїялносци Општини и покраїнска посланїца Драґана Потпара и покраїнски посланїк Ненад Трбович.
У обєкту „Оддих” обезпечени 24-годзинови квалитетни условия, медицинска старосц и фахови надпатрунок за особи з почежкосцами у розвою, а з тей нагоди Видеканїч визначел же „Белава птица” зоз свою роботу у тей обласци социялней защити може буц приклад и другим локалним самоуправом.
Як гварел Кошутич, у тим обєкту за биванє рошнє число хасновательох и тераз го хасную 76 особи, медзи нїма и котри там нєпреривно змесцени. Нова превозка будзе хаснована за превоженє хасновательох дньового пребуваня, алє будзе доступна и другим особом з инвалидитетом.
„Оддих” служи и як прилапююца станїца за особи котри ше найду у даяких загрожених позярядових ситуацийох скоро з цалого Заходнобачкого округу, як и за дочасове змесценє дзецох з почежкосцами у розвою.
