ВЕРБАС – Пияток у Вербаше отримани Саям образованя хтори у голу Центра за физичну културу „Драґо Йовович” позберал велїх викладачох, односно 13 стреднїх школох и 6 високих школох и факултетох з околних општинох и городох.
Манифестацию отворел предсидатель Општини Вербас Милан Ґлушац хтори виражел задовольство пре вельку нащивеносц, а Йован Вукчевич зоз Школскей управи Нови Сад гварел же Саям єдна з найлєпше орґанизованих манифестацийох такей файти.
Помоцнїца предсидателя Општини Вербас задлужена за образованє Даница Парошки визначела же школяре основних школох орґанизовано нащивели Саям, а кажда школа обдумала свойо представянє.
З цильом промоциї системи дуалного образованя на Сайме ше представели и компаниї „Витал”, „Карнекс” и „Тривит”, а отримана и роботна схадзка зоз школярами, просвитнима роботнїками и представителями Школскей управи.
Окрем стреднїх школох з Вербасу, Ґимназиї „Жарко Зренянин”, Стреднєй фаховей школи „4. юлий” и Стреднєй медицинскей школи „Козма и Дамян”, основцох заинтересовали и Польопривредна школа зоз Футоґу, Економска школа зоз Кули, Карловацка ґимназия и велї други школи.