Порядни виберанки за предсидателя Републики Сербиї скоро извесно буду отримани на Квитну нєдзелю, 9. априла. Друга нєдзеля у априлу одвитує законским предиспозицийом. Углавним, чим тих дньох, односно найдалєй по 3. марец, урядово буду розписани предсидательски виберанки, урядово почнє и предвиберанкова кампаня, гоч вона, поправдзе, уж навелько тирва. Скоро 20 политичаре потераз обявели же ше буду кандидовац. Єст ту озбильних и полуозбильних кандидатох, даєдни ше уж оддумали лєбо притулєли ґу фаворитом. Цо ше дотика слова закона, шицко то лєм медийне шпекулованє, по момент кед виберанки буду наисце и розписани.
Од того моменту, як и потераз, „Руске слово” у окреме означеней рубрики будзе провадзиц кандидатох, їх предвиберанково активносци и порученя, каждого з єднаку увагу и у истим обсягу. Акцент будзе на афирмативних порученьох и тим цо думаю поробиц кед достаню довириє гражданох, а нє цо думаю єден о другим. Нє лєм закон, алє и професийни стандарди и новинарска етика накладаю же бизме читачом/гласачом пласовали подполну и нєпристрасну информацию о кандидатох и їх програмох, а конєчну одлуку кому да довириє, сам принєше кажде з нас на гласацким месце.
Окрем предсидательских, можебуц ознова будземе мац и парламентарни виберанки о хторих державне руководство ище ма одлучиц чи су наисце (нє)потребни понеже ше за актуални состав Народней скупштини Сербиї гласало нєполни рок назад. Попри виберанкох на националним уровню покус у циню остало же у маю и порядни термин за локални виберанки у Беоґрадзе, односно за Скупштину городу Беоґраду.
Тиж и дзепоєдни општини у держави, хтори пре рижни причини влонї нє могло уклопиц до порядного виберанкового ритму, того року муша отримац виберанки. На подручу АП Войводини то општини Ковин, Оджак и Вербас, хтори нам, як локална самоуправа дзе жиє вельке число Руснацох, вшелїяк найинтересантнєйши. Прето тим виберанком пошвециме подєднаку увагу и простор, як и предсидательским.