СУБОТИЦА – Члени Дружтва Руснацох у Суботици (Дружтво) пияток, 3. марца, отримали свою порядну Рочну скупштину, на хторей прилапени финансийни и звит о роботи за прешли, як и план роботи за 2017. рок, дознава Рутенпрес од предсидателя Дружтва Ивана Гардия.
Як у звиту о роботи винєсол спомнути Гарди, плановани програмни активносци секцийох Дружтва у 2016. року витворени, а попри участвованя на наших фестивалох, члени Дружтва участвовали и на змаганьох у рамикох Спортских бавискох „Яша Баков”, дзе були и домашнї змаганю у одбойки на писку.
И надалєй найвекши проблем у роботи Дружтва Руснацох у Суботици то нєдостаток просторийох за порядну роботу. У прешлим року од городскей власци достати просториї, алє у барз подлим стану, а понеже нє достали нїяку финансийну потримовку за їх потребне значне оправянє – врацени су назад, так же ше Руснаци у Суботици тераз сходза у просторийох Здруженя Македонцох „Илинден”, дзе отримана и схадзка Скупштини.
Пре нєдостаток простору, прешлого року у Суботици нє було орґанизоване анї факултативне виучованє руского язика, анї робота рецитаторскей и драмскей секциї, так же доставанє адекватних просторийох за Дружтво єден з главних задаткох у роботи у тим року.
Културна манифестация „Яр Мафтея Виная”, хтору традицийно орґанизує Дружтво, мала би буц отримана того мешаца. И того року Руснаци у Суботици буду домашнї турниру у одбойки на писку у рамикох СБ „Яша Баков”, а з порядну роботу предлужи и шпивацка ґрупа.
Ґу тому, робота Дружтва Руснацох у Суботици того року будзе унапрямена и на цо лєпше пририхтованє Централней преслави Националного швета Руснацох у Сербиї, хтора у януаре 2018. року будзе у Суботици.
Як за Рутенпрес гварел Иван Гарди, Дружтво у 2016. року финансоване з Националного совиту Руснацох, Городу Суботица и донацийох.