Волонтеризем лєбо волонтерство єден з тих алтернативних концептох дружтвеного анґажованя и активносци хтори остатнїх рокох можебуц и найшвидше уходзи до нашей заєднїци и найбаржей є видлїви. Уж роками маме волонтерски кампи у наших местох (Коцур, Руски Керестур… ) орґанизовани за рижних учашнїкох и коло рижних активносцох – младежских, духовних, културних… а хтори, заш лєм, дзеля цошка заєднїцке. Волонтере, по власней дзеки, о своїм трошку и без материялного надополнєня приходза до єдного штредку помогнуц, охабиц шлїд, дац себе. Збогациц и себе, и других.
Нє лєм же би ше зазначело подїї, алє и пре чувство и опредзелєнє же то цошка добре и чесне, „Руске слово”, так повесц, од початку провадзи волонтерски активносци и дава им медийни простор. И у тим, и у предходним чишлє єст нагоди читац о рижних аспектох волонтеризма, а видзи ше ми же з такима написами нїґда нє мож превершиц. Бо од волонтеризмa нє лєм же єст конкретного хасну, кед волонтере попорая, ожелєня лєбо прикраша наш животни простор, алє су тиж и свойофайтово „амбасадоре” Руснацох и наших валалох. Кед ше враца дому, часто и на другим концу швета, годни бешедовац о „еґзотичним” народу у штред ровнїни и можебуц ище дакого навесц же би нас упознал.
Ище значнєйше же през волонтеризем и нашо млади, будуци лидере заєднїци, уча, здобуваю искуства и схопносци як функционовац и умрежиц ше зоз шветом, и як то похасновац на локалним уровню.
Поправдзе, длуго сом нє могол похопиц сущносц концепту волонтеризма и мотив волонтерох же би свой час и енерґию потрошели на людзох, лєбо место, хторих нє познаю и можебуц их нїґда вецей знова нє увидза. Ґу тому, треба цошка и робиц, по горучави а без наднїци… Правда, нєшкайше волонтерство нє ма, и нє требало би мац комерциялни ефект, односно же би дахто, та гоч и дружтво, профитовал на безплатней роботи. Значи, часи „ОРА”, Брчко-Бановичи и Шамцу прешли. Нєшкайше волонтерство анї нє тото цо було за ґенерацию дзецох дакедишнїх акцияшох, же после школи лєбо факултету дзешка робиш задармо у надїї же це озда раз „приму”. З порученьом „Упознац людзох, видзиц швет”, вельо є вецей од того. Кед ше уж нє кажде можеме одшмелїц, треба голєм потримац тих цо шму.