Хорске шпиванє нєшка, вчера, ютре

автор лидия пашо
1k Опатрене

На соботу, 2. юния, у Вербаше ше отрима осми Фестивал хорского шпиваня. Такой на початку сцем домашнїм винчовац на їх витирвалосци и пошвеценосци тому Фестивалу. А прецо? Причина тому то же ше Вербащанє, гоч нєвелька заєднїца, вше указали як сердечни и пилни орґанизаторе и теди кед ишло лєгчейше и теди кед було вецей почежкосци. А проблеми нєшка яґод кед би нєрозривно були повязани зоз хорским шпиваньом: нєт досц шпивачох, нєт пенєжи за госцованя, облєчиво за наступ, а вельке препреченє у репертоару то огранїчене число обробкох руских писньох розписаних за хор. Медзитим, я би ше з тей нагоди нє сцела застановиц на поносованю, алє на єдним питаню, котре по моїм думаню представя свойофайтови феномен. Прецо ми, така мала заєднїца, вообще маме тоту прихильносц и (нащесце ище вше) потенциял ґу хорскому шпиваню?
Особнє, мойо перши упечатки вязани за хорски шпив то знїмки Тимкового хору, знїмок концерту зоз Свиднїку кед виводзена Браца Русини. Пошвидко то було шпиванє у дзивоцким хору котри водзел Юлиян Рамач Чамо. И нє було ту вельо нагваряня, надумованя. То були часи кед ше одлуки приношело єдноставно: хто зна шпивац та ходзел шпивац, а хто танцовац – на танєц. Без вельо филозофираня же нач то, и чи будзем солиста, або нєшка барз часте питанє „цо мам з того”.
Шпивало ше часто и вєдно – на галушочкох, остатнїх, розберанкох, у трецей сали у Мензи на свадзби, бичаку, випровадзанкох до войска и розуми ше – у церкви. Споминам тоти нагоди нє (лєм) пре сентименти, алє прето же сцем наглашиц тото же шпиванє було вельо вецей заступене, мало нєзровнано векшу улогу и цо найважнєйше – воно исновало природно, виходзело зоз каждодньового живота. Кед попатриме нєшка – кельо шпиваме, дзе шпиваме, хто ище шпива вєдно кед ше зидзе? Музику ше углавном слуха, цо вецей, слуха ше ю поєдинєчно, кажде за себе. Ту наставаю сущни препреченя вязани за хорске шпиванє у котрим ансамбл, колективизем, творя основу шицкого. Роздумуюци о шицким тим, як було и як нєшка, наруцує ше ми питанє же чом ми ище вше шпиваме, бо по шицким виходзи же то нєможлїва мисия.
Одвит на тото питанє, по моїм думаню, вельо глїбши и започатковани давно. Кед ше врациме на сами початки хорского шпиваня при Руснацох споминаю ше, правда досц розлични податки о перших церковних хорох на концу XIX вику, а перша згадка о хорским шпиваню при Руснацох походзи зоз 1894. року кед у Руским Керестуре основани хор Гармония. О хорских колективох котри основани под уплївом РНПД-а знаме вецей: Керестурске шпивацке дружтво основане у Руским Керестуре 1921. Подобни хори пошвидко настали и у других руских местох – у Дюрдьове 1922. року, у Шидзе 1924, у Петровцох 1925, у Коцуре 1926. року, у Миклошевцох 1928, Вербаше 1933, Новим Садзе, Беркасове и Пишкоревцох 1935. року, Бачинцох 1936, у Райовим селу 1937. року. Зазначени и наступ хору зоз Сримскей Митровици 1941. року, алє рок його снованя нєпознати. Познате и же у дзепоєдних местох паралелно робели вецей хори.
Зоз хорами векшином руководзели дзияко-учителє, котри ше, цо особлїво важне, углавном школовали у Учительскей (дзияцкей) школи у Ужгороду. У тей школи єден час викладал Константин Матезонски, снователь першого вецейгласного хору у Ужгородским катедралним соборе. Учителє котри закончели Учительску школу достали добру музичну приготовку, приношели зоз собу нови писнї, часописи, кнїжки. Медзи нїма бул и визначни учитель Петро Кузмяк.
Як видно, хорске шпиванє од давна часц нашого народу. Спатраюци хорске шпиванє з такого угла, можебуц и нє таке чудне прецо ше воно так моцно укоренєло при Руснацох. Усудзим ше повесц же ище вше кошиме з того цо нашо предходнїки зашали, укладали и пестовали. И правда, нєт нас вельо, алє шпивац можеме добре, можеме медзисобно „жичац” шпивачох, можебуц дзекеди наступиц заєднїцки, шицки нашо хори. Ясно, и у тей дїялносци як и у других, без основних средствох нєможлїве функционовац.
Єдному хорскому колективу потребни наступи, госцованя, бо то нагода придобиц, одушевиц нових членох, здобуц виводзацку праксу и усовершовац ше. З другого боку нє менєй значне же би руководителє хорох добре познали и руску хорску литературу, гоч яка є скромна, або же би мали дакого хто их упозна зоз ню. Драгоцине би було и кед бизме мали нови хорски аранжмани руских шпиванкох. Тото цо найважнєйше, цо фундамент шицкого то хористи. Покля єст ентузиястох, людзох порихтаних видзелїц свой час, свойо обовязки ускладзиц зоз пробами и цо найважнєйше, буц порихтани на колективну активносц, потамаль будземе мац хори. На щесце, ище нас єст!

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ