Чи пролетере маю отечество?

автор мария перкович
699 Опатрене

Уж даскельо мешаци назад, тема у медийох робота наших державянох, насампредз младих з Войводини, у фабрикох у иножемстве, дзе у фокусу Словацка. У ствари, о експлоатованю роботнїкох, подлих условийох роботи и змесценя, подозривих контрактох и ище подозривших аґенцийох хтори их конча. Найчастейше ше як роботодавателє споминаю дзепоєдни ґиґантски компанї з юговосточней Азиї и ЗАД. Значи, у медийох знова маме ситуацию у хторей, стандардно,  нашо людзе лєбо жертви цудзей галавосци и злих намирох „медзинародней конспирациї” процив Сербиї, лєбо „подлїни хтори нє сцу робиц”. Обидва становиска, базовани на урядовей идеолоґиї национализма и нео-либерализма, премахую тему.

Нїхто нє преноши преверлїви информациї  о скорейших штрайкох хтори ше пре потуперня роботного законодавства случовали у погонох хтори тоти мултинационални ґиґанти маю у матичних державох. Тиж, нїхто анї нє поставя питанє хторе ше саме надрилює: Чом у критикованих фабрикох нє робя Словаци, кед су уж у їх держави? На концу, нїхто анї нє пробовал направиц паралелу же у яких скандалозних условийох робя заняти у фабрикох у Сербиї, без огляду чи им власнїк иножемна компания, чи домашнї тайкун.

Случай зоз южнокорейску фабрику у Словацкей нє питанє националистичного зраженя „нас и їх”, алє зраженя швету роботи и швету капиталу, односно класичного класного зраженя. Же то так, гутори и податок же наприклад, у 2015. року у Сербиї бул лєм 21 штрайк и 12 роботнїцки протести, а ботрба процив „шивей економиї” почина и закончує ше на розплашованю улїчних тарґовцох хтори пробую скерпиц конєц з концом,  покля „вельких бавячох” нїхто нє руша. Медзитим, заш лєм, 24 годзини слухаме же треба робиц 24 годзини, а место же би ше бранєло людске достоїнство роботнїка, слухаме улїзованя инвеститором. Ясне же политична елита геройство толмачи як Супергик зоз „Алана Форда” – однєй худоби, дай богачом.

Сущносц же ґиґантски мултинационални корпорациї єднак гнобя и експлоатую занятих ширцом швета. Ясне же маю политичну и судску защиту хтору обични чловек нє може звладац. Прето вец маме реалносц дзе пролетарият зоз Сербиї пристава на шицко же би робел у фабрикох у Словацкей, чий пролетарият так исто пристава на шицко же би робел у фабрикох на Заходзе.

У таких правилох бависка, ясне же пролетере нє маю отечество; отечество роби процив нїх.

ПОВЯЗАНИ ТЕКСТИ