СВИДНЇК (СЛОВАЦКА) – Всоботу, 27. мая вечар, за Мис Русинку вибрана Яна Пласова з Ческей Републики, за Першу вице-мис Анґелика Глинка зоз Зєдинєних Америцких Державох, а за Другу вице-мис Русинку вибрана Яна Еделински з Руского Керестура.
Вибор за Найкрасшу Русинку (Miss World Rusin) того року перши раз орґанизовани у рамикох Пиятого Фестивалу русинскей култури, популарного Русинского фестивалу у Свиднїку, у Словацкей Републики, хтори закончени вчера, а тирвал од пондзелку, 22. мая.
Як Рутенпрес всоботу вноци поинформовал предсидатель Роботного цела за младеж Националного совиту Руснацох Саша Сабадош, котри з ище 13-ерима младима з наших местох на орґанизованей екскурзиї у Словацкей, вибор за Найкрасшу Русинку бул на сцени у амфитеатру у Свиднїку, а участвовали осем з дзешец приявених дзивкох – зоз Сербиї, Словацкей, Ческей, Румуниї и Зєдинєних Америцких Державох.
Руснацох зоз Сербиї у финалним виборе представяли аж три дзивки – Яна Еделински з Руского Керестура, Мария Хромиш з Дюрдьова и Силвия Сокол з Бикич Долу, а нє присуствовала першобутно приявена Анастазия Роман з Керестура, як и єдна кандидатка з Румуниї.
Кандидатки за Найкрасшу Русинку ше у Свиднїку представяли з кратким видео- знїмком, танєчну точку и вокалну нумеру, а оценьовал их окремни жири, з хторим предшедовала представителька Словацкей Републики у виборе за „Мис Универзум” 2006. року Юдита Грубийова.
Miss World Rusin, найкрасша Русинка Яна Пласова за освоєну титулу од орґанизатора достала 1 000 еври, Перша вице-мис (перша провадзачка) Анґелика Глинка 600, а Друга вице-мис (друга провадзачка) Яна Еделински 400 еври.
У културно-уметнїцкей програми на Русинским фестивалє у Свиднїку пияток и соботу участвовала Жридлова мишана шпивацка ґрупа КПД „Карпати” з Вербасу, як и член „Карпатох” скулптор Милорад Правуляц з Вербасу, котрому на Фестивалє орґанизована вистава подобових роботох. Попри представительох вербаского КПД, госци Фестивалу и городоначалнїка Свиднїку Яна Голодняка була и делеґация Вербасу, на чолє з предсидательом Општини Миланом Ґлушцом, представителє НС Руснацох, як и други особи з нашей заєднїци.
Главни орґанизатор Фестивалу русинскей култури була Окружна орґанизация Русинскей оброди Словацкей за Свиднїк, а соорґанизаторе Место Свиднїк и свиднїцки Поддуклянски образовни центер.
Фестивал отримани под покровительством предсидателя Словацкей Републики Андрея Киску, а з финансийну потримовку Уряду Влади Словацкей, з Програми за културу народносних меншинох.