ВЕРБАС – Парохиянє вербаских парохийох вчера преславели Перши дзень Велькей ноци. У нововербаскей парохиї була Служба Божа з Утриню, после чого пошвецени коло 120 кошарки з пасхалним єдзеньом.
У полней церкви нововербаски парох о. Иґор Вовк пречитал Вельконоцну винчованку преосвященого владики кир Георгия Джуджара. О. Вовк тиж наглашел же Христово воскресенє муши кажди дзень буц у наших шерцох, и сами кажди дзень и мушиме воскреснуц до вше лєпших людзох, котри буду любиц блїжнїх, алє и своїх нєприятельох.
У парохиї Св. Владимира у Новим Вербаше нєшка Служба на 9 г. а после Служби будзе Вельконоцна програма дзецох, хтору з нїма пририхтала шестра Венямина.
У старовербаскей парохиї Покрова Пресвятей Богородици Служба з пошвецаньом кошаркох вчера була на 10 г., на Служби було красне число парохиянох, а пошвецени прейґ 90 кошарки.
И старовербаски парох о. Алексих Гудак вирним пречитал Вельконоцну винчованку владики, кир Георгия Джуджара, наглашуюци же у нєй найбаржей одзвонює виреченє же кед би Исус нє воскреснул, швет би бул у гаосу.
После Служби у одборнїци Парохиї була вистава дзецох котри ходза на виронауку и пестованє руского язика, хтору з дзецми пририхтала учителька Славица Мали. Нащивителє могли опатриц фарбену крижну драгу, фарбени писанки, винчованки и други роботи.
У тей парохиї нєшка, на Други дзень швета, Служби буду на 8 и 10 г., а после обидвох будзе мированє. Служба на 10 г. будзе Архиєрейска, понеже ю будзе предводзиц наш владика Георгий Джуджар.
