ВЕРБАС – Концом прешлого тижня у Вербаше отворена Посланїцка канцелария, у хторей народни посланїки з вербаскей општини буду примац и бешедовац з гражданами. Як пише портал Општини Вербас, Канцелария ше находзи у будинку Културного центру Вербас и за стретнуца з гражданами будзе отворена вовторок и стреду од 8 до 13 годзин.
З вербаскей општини посланїки у Народней скупштини Републики Сербиї Маряна Мараш (СПС), Иґор Бечич (СНС) и Иван Костич (Рух „Двери”).
Вербаска општина медзи 12 општинами у Сербиї у хторих отворени таки посланїцки канцелариї, а после уключованя Општини до проєкту ЦЕСИД-у и Националного демократского институту, пре моцнєнє директного комуникованя медзи гражданами и їх представителями. Канцелария часц проєкту „Людзе на першим месце”, хтори финансує Американска орґанизация за медзинародни розвой.
На отвераню Посланїцкей канцелариї у Вербаше присуствовал и директор Националного демократского институту Ненад Белчевич, як и народни посланїки з вербаскей општини.