ВЕРБАС – Вчера у вербаским КПД „Карпати” конституовани Пододбор за демоґрафию, як часц Одбору за службене хаснованє язика и писма Националного совиту Руснацох.
Национални совит на остатнєй схадзки до Пододбору меновал Ксению Бесерминї з Коцура, Дарию Медєши з Вербасу, Борислава Сакача з Нового Саду, о. Михайла Малацка з Руского Керестура, о. Владимира Еделинския Миколку з Беркасова и Мирослава Чакана з Дюрдьова.
На схадзки предложене же би предсидатель Пододбору за демоґрафию бул Борислав Сакач, а понеже на схадзки були присутни тройо з шесцерих членох, одсутних ше будзе консултовац чи ше складаю з таким предкладаньом.
Порадзене же на шлїдуюцей схадзки Пододбору будзе прилапени Дїловнїк о його роботи, а як визначене, Пододбор за демоґрафию будзе мац рижни и комплексни роботи, бо демоґрафске питанє ма вельо аспекти о хторих ше дотераз нє досц здзбало.
Попри членох Пододбору – Ксениї Бесерминї, Дариї Медєши и Борислава Сакача, на схадзки присуствовали и предсидатель ВО Националного совиту Желько Ковач, член ВО Микола Шанта, котра на НС и предложел снованє такого пододбору, як и секретар НС Таня Арва Планчак.
