РУСКИ КЕРЕСТУР – Предостатнї дзень роботньох на хторих ше на Медзинародним волонтерским кампу у Руским Керестуре представя народи котри жию у Войводини, члени Културно-уметнїцкого дружтва (КУД) „Иван Сенюк” з Кули вчера представели Українцох.
Презентацию и историю народного облєчива волонтером отримал предсидатель Националного совиту Українцох у Сербиї Йозо Сапун, котри и член кулского КУД-у, а потим ше волонтере и сами пооблєкали до народного облєчива. Мож повесц же спомедзи до тераз отриманих представяньох Руснацох, Мадярох и Словацох на Волонтерским кампу, Українци найвирнєйше и найинтересантнейше презентовали свойо традицийне облєчиво.
У часци правеня националних єдлох волонтере, з помоцу женох з КУД „Иван Сенюк”, правели пироги зоз сиром, пражену сланїну, найпознатше українске традицийне єдло Борщ и друге.
На нєшкайшей остатнєй роботнї о мултикултуралносци Войводини будзе представена сербска култура и єдла, а на мению будзе ґибаница и рижни покераї.