Вше будзе наша Матка

автор наташа макаї мудрох
1.1k Опатрене

„…Руски народ ище нїґда нє мал таки повольни условия, прето треба да их вихаснує, т. є. да ше с подполносцу прилапи роботи же би очувал свою народносц и розвил свой язик.“ –  так записане у записнїку зоз Першей главней Скупштини снованя секциї „Рускей Матки”, отриманей у Новим Садзе, 10. фебруара 1946. року.

И, ниа, прешли од теди полни 70 роки! Ми ту, на истей адреси, зоз истим цильом. Правда, под другим меном и єст нас вельо вецей. Була „Руска Матка”, КУД „Максим Горки”, „Барвинок”, Руске културно-просвитне дружтво, а тераз зме Руски културни центер. Як ше меняли часи, так ше меняла назва, алє нашо Руснаци, а и нє лєм Руснаци, и тераз гуторя же иду до Матки.

Велька ми чесц же ше праве мнє ушло буц руководзаца у тим ювилейним року. Правда, кельо теди були вигодни условия, тераз  у тим виберанковим року, кед финансиї за културу вельо менши як потерашнї, направиц преславу яку зме наисце задумали – нє лєгко.

Вшелїяк, шицки програми, котри отримани у тим року, а було их надосц, були у знаку ювилея.

Тото цо ме окреме радує, то факт же Руски културни центер (РКЦ) нє траци на своїм квалитету. У своєй широкей палети понукнуцох, попри фолклорних змистох, Новосадянє маю и барз успишни и квалитетни алтернативни змисти. Од исконского по ултра модерне. Правда, часто ше то знєважує, нє препознава, и нє припознава. Голєм нє явно. Озда прето же виходзи звонка якогошик надрилєного рамика. Иншаки танци, иншаки аранжмани, „моцнєйши” театрални представи, иншаки младежски програми, иншаки способ роботи з дзецми… Иншаки, а исти. Прилагодзени варошу. Основа – рускосц, а додатки провадза варошски живот и „цошка цо иншаке”. И подписуєме квалитет. То барз важне.

Цешим ше же шицки фахово руководителє секцийох маю сцелосци и витирвалосци твориц за свой народ. У нас ше твори зоз шерца. Кажде з нас до того Дружтва уткал часц себе, дахто вецей, дахто менєй, алє РКЦ (Матка) наисце место дзе ше шицки дзечнє сходза.

Просториї, нажаль, таки яки су. Руски културни центер ту жедляри. Чи ше будзе валяц, чи ше будзе правиц нове, кеди ше даякей пременки по тим питаню можеме наздавац… На тоти питаня одвит чекаме роками. А будинок препада. И нє цешиме ше зоз тим же на цо здабе. Пробуєме „нашминкац” же би кельо-тельо було красше и приємнєйше. Реновирали зме Клуб, потим Малу салу, алє остало нам ище вельо того цо би меняц.

Нє прешол ище анї рок як сом на тим роботним месце. Задовольна сом кельо того за тот час зробене. Анї єдна пременка нє лєгка. Якошик сом самей себе дала задаток тот перши рок звикнуц ше єдни на других. Шлїдующи три, по конєц мандату, дац ше до реновираня, твореня нових програмох, робиц на лєпшей реклами РКЦ, уключованя нових людзох до роботи.

Члени РКЦ указали же маю дзеку присц робиц чи поєдинєчно, чи на роботни акциї. Шицким нам важне же би нам Матка, у хторей ше сходзиме, була цо красша и чистейша. Окреме пре дзеци. Им треба створиц условия же би дзечнє ту приходзели. И же би єдного дня предлужели тото цо ми робиме.

На концу, можеме ше похвалїц же нам активни велї секциї: Дзецински фолклор РКЦ, Дзецински хор РКЦ, Мишани хор „Гармония”, Виводзацки фолклорни ансамбл, Фолклорни ансамбл ветеранох, Народни оркестер РКЦ, Женска шпивацка ґрупа, Хлопска шпивацка ґрупа, Драмски студио РКЦ…

По часточку зоз шицкого того будзеце мац нагоду дожиц од 18. по 20. новембер того року, кед буду закончуюци програми 70-рочнїци. Щиро поволуєм шицких же би возвелїчали тото нашо вельке швето.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ