Дзе бунт !?

автор яким винаї
1.2k Опатрене

„На младих швет остава”, гваря, а анї сами до того нє веря. После 19. по шоре, мултимедиялней манифестациї „Дньовка”, сцел бим ше огляднуц на єй розвой през шицки тоти роки. Бул сом релативно млади кед сом першираз чул за ню, алє аж и пребарз млади же бим похопел о чим ше точно роби. Тераз, 15 роки познєйше, шицко вельо яснєйше. Кельо ґод ше я, и шицки активни члени Пакту, намагали врациц „Дньовку” на стару драгу, вше яснєйше же то, практично, нєможлїве. Углавним, векшина тих котри почали цалу тоту приповедку уж навелько одроснути людзе, поженєти, поодавани и на даяки способ ситуовани. Мало єст тих котри дзечнє приповедаю як то дакеди було. А тим котри теди нє були анї народзени, або були барз мали, нє мож цалком дочаровац як то точно було. А було иншак. Цалком.

Нїґда нє було чежше орґанизовац „Дньовку” як цо то тераз. Нє гварим же нє мож, алє нєнормално чежко. Ниа, наприклад, остатнї два роки ми (Пакт екипа) зволуєме и нагваряме людзох же би участвовали, а приявюю ше барз мало. На фото конкурс, котри ма и пенєжни награди, того року ше приявели тройо. А цо найгорше, твердзим и стоїм за тим, же у нашей, рускей заєднїци, такей малей яка є, маме ґенийох литератури, музики и култури ґенерално, алє ше обавам же нїґда нїхто за нїх анї нє учує. Тото цо крашело скорейши зазберованя и твореня младих, тот бунт, тота панк култура одразу дзешка скапала. И кед ше скрива даґдзе, лєбо ю мож нагаднуц, вец то у велькей мири у завартим кругу, або на интернету. А годна там и остац. Нєшка ше револуциї водзи поцихи, за компютерами, по блоґох и статусох. Кед треба повесц наглас и пред публику, ту наступа цихосц. Ґенерално, цале нашо дружтво виновате за таки стан, по моїм думаню, прето же ше помали завераме и поставаме конзервативне дружтво. А у таким дружтве нєт места за „Дньовку” и подобни програми. Праве така є обдумана же би одскаковала од „нормалного”, же би була нєзвичайна, окремна, єдинствена. Спреведал бим кед бим повед же ме нє дотикаю коментари як цо то „нє пойдзем на „Дньовку”, бо там сами дзеци”, напроцив, доживюєм то як особне пораженє. И з тей нагоди сцем окреме подзековац шицким котри ше одволали и того, и прешли роки, кед бим могол, каждому бим медалю дал, прето же наисце заслужели. Лєгко шедзиц у публики и коментаровац, а мало хто ше прияви висц на бину.

Можебуц то знак же досц. Нєлєгко ми припознац таке дацо, алє можебуц вецей нєт смисла орґанизовац цошка за цо нєт дзеки. Нарок, ювилейна 20-та, можебуц то и права нагода положиц точку на цалу приповедку. Не чекац най сама препаднє. Панк из, випатра, дед!

Цо ше дотика роботи Пакту, любел бим кед би Пакт жил занавше. Пачи ше ми як ше розвива, досц часто ше меняю людзе, зоз новима лїцами приходза и нови идеї. Финансиї, нажаль, вше були проблем, алє и зоз тим Пакт заш лєм обстал. Формати котри Пакт орґанизує маю традицию, алє помали траца публику. Можебуц час за дацо инше, дацо нове и то цошка цо треба потримац. Любим думац же праве млади знаю цо добре за младих. Перши ше находзим у тим, прето же и сам помали ґажим трицец плус, и апсолутно нє мам анї найменши проблем придац штафету. Гоч, у дружтвеним живоце Руснацох нєт вельо конкретни приклади за тото твердзенє. Млади ше углавним споминаю лєм кед даяки виберанки, лєбо кед треба плакац над „руску долю”. Но, то уж политика, то єст баржей политиканство, а на тото нє вредзи даремно трациц час.

Прешвечени сом же шицки тоти нєволї, то лєм єдна фаза. А кажда фаза преходзи, та прейдзе и тото. Шицко ма свой час. Покля єст дзеки, будзе и Пакту и „Дньовки”, лєм можебуц под другим меном.

Окреме ми мило кед видзим же ше и окрем Керестура, руска младеж по местох дзе жию Руснаци дакус баржей активовала. Ожил Дюрдьов, Нови Сад практично воскреснул зоз рижнороднима и квалитетнима змистами, у першим шоре за младих. Идеї вше єст, рижнородни, и од того шицко почина. Прейдзе ше и прейґ финансийох и велїх других почежкосцох, кед єст идеї и дзеки. На концу, любим думац же єдного дня тоти млади котри преходза прейґ шицких бариєрох же би принєсли цошка нове до нашого дружтва, єдного дня буду и на самим чолє истого. Праве тераз и так ше збера искуствиє котре треба же би похасновало  лидером котри треба же би нас одведли до будучносци, яка ґод вона була. Лєм ше боїм, же би и тоти будуци лидере нє забули же и вони раз були млади…

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ