КОЦУР – Вчера, 1. октобра, коцурски парохиялни Каритас орґанизовал друженє за старих, з нагоди октобра – Мешаца старих особох. На тим друженю було вецей як трицец старши особи, а з нїма була шестра Михаїла Воротняк, як и волонтере Каритасу.
Учашнїки ше дружели, мали рекреативни бависка, дакус и танцовали и шпивали. Найвеселши и найсхопнєйши у бавискох достали скромни награди, а єдна волонтерка шицких почасцела и зоз торту.
– Єст єдно красне виреченє, а воно гвари ,,Крашнє буц стари”.Старосц може буц и красна и шицки бизме требали буц подзековни же зме нєшка сцели и могли присц – гварела шестра Михаїла.
Вона здогадла шицких присутних на значенє мешаца октобра, як и на волонтерох котри шицко потримую и укладаю свой труд и час.
На тим друженю бул дати простор и гуманосци, та так ше позберали пенєжни средства як помоц за Матея Дудаша котрому потребне пойсц на терапиї до иножемства.
– То и єдна з мисийох Каритасу, помогнуц шицким тим котри у потреби – визначела за конєц шестра Михаїла Воротняк.