Еколоґийни рух Вербас писал Делеґациї Европскей униї у Сербиї

автор апм
797 Опатрене

ВЕРБАС – Розчаровани пре пожнєнє законченя роботох на Централним построєню за пречисцованє одрутних водох у Вербаше и застарани пре идею же би ше го до роботи пущело нєзакончене, члени Еколоґийного руху Вербас послали отворене писмо Делеґациї Европскей униї (ЕУ) у Сербиї.

Рух шефови Делеґациї ЕУ у Сербиї Майклови Давенпортови пише же таке ришенє нєдопущуюце и далєко є од европских стандардох хтори Делеґация прокламує, а одвичательносц за подле одношенє спрам инвестициї члени Руху у писму приписую и Министерству польопривреди и защити животного штредку.

Ґу тому, пролонґованє законченя роботох на Построєню за лєто 2016. року еколоґове оценюю як ище єден страцени рок, а розчаровани су и прето же тота орґанизация нє мала право уключиц ше до рижних ґрупох за ришованє проблему заґадзеного Велького бачкого беґелю.

– Европска уния найзначнєйши економски и политични партнер Сербиї. Нашо намаганє же бизме ше приключели и Вашо право же бисце нам за то одредзели условия, даваю Вам реални уплїв на найвекших политичних и економских актерох у Сербиї. Кед нє знаце цо будзеце з ЕУ инвестицию у Вербаше, дайце предносц дакому инвентивнєйшому – медзи иншим стої у отвореним писму Еколоґийного руху Вербас Делеґациї ЕУ у Сербиї.

ПОВЯЗАНИ ТЕКСТИ